ye dhup giri hai jo mere lawn mein aa kar
le jaegi jaldi hi ise sham uTha kar
sine mein chhupa sham ki aaankhon se bacha kar
ek lahr ko hum lae samundar se uTha kar
han waqt se pahle hi uDa degi ise subh
rakkhi na gai chand se gar shab ye daba kar
ek subh bhali si mere nazdik se guzri
main baiTha raha hijr ki ek raat bichha kar
phir subh se hi aaj alam dekh rahe hain
yaadon ki koi film mere dil mein chala kar
phir chae mein biscuit ki tarah bhuki si ye sham
kha jaegi suraj ko samundar mein Duba kar
Ghazal
Ye dhup giri hai jo mere lawn mein aa kar
Swapnil Tiwari