ye aankh kyun hai ye hath kya hai
ye din hai kya chiz raat kya hai
firaq-e-KHurshid-o-mah kyun hai
ye un ka aur mera sath kya hai
guman hai kya is sanam-kade par
KHayal-e-marg-o-hayat kya hai
fughan hai kis ke liye dilon mein
KHarosh-e-dariya-e-zat kya hai
falak hai kyun qaid-e-mustaqil mein
zamin pe harf-e-najat kya hai
hai kaun kis ke liye pareshan
pata to de asal baat kya hai
hai lams kyun raegan hamesha
fana mein KHauf-e-sabaat kya hai
'munir' is shahr-e-gham-zada par
tera ye sehar-e-nashat kya hai
Ghazal
Ye aankh kyun hai ye hath kya hai
Muneer Niyazi