یہی نہیں کوئی طوفاں مری تلاش میں ہے

یہی نہیں کوئی طوفاں مری تلاش میں ہے
کہ موسم غم جاناں مری تلاش میں ہے

وصال رت ہے مگر دل کو ایسا لگتا ہے
ستارۂ شب ہجراں مری تلاش میں ہے

میں فیصلے کی گھڑی سے گزر چکی ہوں مگر
کسی کا دیدۂ حیراں مری تلاش میں ہے

یہ بے یقین سی آسودگی بتاتی ہے
کہ ایک قریۂ ویراں مری تلاش میں ہے

میں تیرگی میں محبت کی اک کہانی ہوں
موئی چراغ سا عنواں مری تلاش میں ہے

یہ کیسا خواب تھا دھڑکا سا لگ گیا دل کو
کہ ایک شخص پریشاں مری تلاش میں ہے