yahan se chaaron taraf raste nikalte hain
Thahar Thahar ke hum is KHwab se nikalte hain
kisi kisi ko hai tahzib-e-dasht-arai
kai to KHak uDate hue nikalte hain
yahan riwaj hai zinda jala diye jaen
wo log jin ke gharon se diye nikalte hain
ajib dasht hai dil bhi jahan se jate hue
wo KHush hain jaise kisi bagh se nikalte hain
ye log so rahe honge jabhi to aaj talak
zaruf-e-KHak se KHwabon bhare nikalte hain
sitare dekh ke KHush hun ki roz meri tarah
jo kho gae hain unhen DhunDne nikalte hain
Ghazal
Yahan se chaaron taraf raste nikalte hain
Idris Babar