یا رب جو خار غم ہیں جلا دے انہوں کے تئیں
جو غنچۂ طرب ہیں کھلا دے انہوں کے تئیں
انکار حشر جن کو ہے اے سرو خوش خرام
یک بار اپنے قد کو دکھا دے انھوں کے تئیں
کہتے ہیں ابرو و مژہ خوں ریز ہیں تری
ظالم کبھی ہمیں بھی بتا دے انہوں کے تئیں
اس شمع رو کا مجھ سے جو کرتے ہیں سرد دل
اے آہ سوز ناک جلا دے انہوں کے تئیں
سوزاں ہے داغ ہجر مرے دل میں مثل شمع
اے یاد وصل یار بجھا دے انہوں کے تئیں
کرتے ہیں سرکشی جو کف پا سے آبلے
اے خار دشت عشق بٹھا دے انہوں کے تئیں
جو صاف و بے غبار ہیں بیدارؔ آشنا
جوں سرمہ اپنی چشم میں جا دے انہوں کے تئیں
غزل
یا رب جو خار غم ہیں جلا دے انہوں کے تئیں
میر محمدی بیدار