wo nahin milta mujhe is ka gila apni jagah
us ke mere darmiyan ka fasla apni jagah
zindagi ke is safar mein saikDon chehre mile
dilkashi un ki alag paikar tera apni jagah
tujh se mil kar aane wale kal se nafrat mol li
ab kabhi tujh se na bichhDun ye dua apni jagah
ek musalsal dauD mein hain manzilen aur fasle
peD to apni jagah hain rasta apni jagah
Ghazal
Wo nahin milta mujhe is ka gila apni jagah
Iftikhar Imam Siddiqi