wo KHayal-e-muhaal kis ka tha
aaina be-misal kis ka tha
safari apne aap se tha main
hijr kis ka visal kis ka tha
main to KHud mein kahin na tha maujud
mere lab par sawal kis ka tha
thi meri zat ek KHayal-ashob
jaane main ham-KHayal kis ka tha
jab ki main har-nafas tha be-ahwal
wo jo tha mera haal kis ka tha
dopahar baad-e-tund kucha-e-yar
wo ghubar-e-malal kis ka tha
Ghazal
Wo KHayal-e-muhaal kis ka tha
Jaun Eliya