Wo ham-safir the to qafas bhi chaman hi tha

wo ham-safir the to qafas bhi chaman hi tha
ab jaise aashiyan bhi mera aashiyan nahin

mere junun pe un ko KHalish si zarur hai
ye aur baat hai ki wo kuchh mehrban nahin

sab na-ummid ho ke zamane se ja mile
ahl-e-wafa ka aaj koi raaz-dan nahin

kaisi bahaar kaisa chaman kaisa mai-kada
mera lahu bhi pi ke ye duniya jawan nahin

hum ahl-e-gham ke pas dil-e-KHun-chakan to hai
tum ko sunaen haal wo tarz-e-bayan nahin

naseh ki zid pe charKH ko lana tha rah par
kaise kahen ki sai-e-junun raegan nahin