وہ گھڑی وہ رت گئی وہ دن گئے موسم گئے

وہ گھڑی وہ رت گئی وہ دن گئے موسم گئے
ساتھ اک جان وفا کے کتنے ہی عالم گئے

وہ گئے تو اور پھر کوئی نہ ان سا مل سکا
وادی وادی ہم پھرے پورب گئے پچھم گئے

آس ٹوٹی دل کی یا کوئی نیا وعدہ ہوا
اے شب غم کیا ہوا کیوں میرے آنسو تھم گئے

ایک ہم جو تجھ سے چھٹ کر بھی ترے در کے رہے
ایک وہ جو بزم میں رہ کر بھی نامحرم گئے

آج سے خوش رہ کے بھی دیکھیں گے تیرے غم نصیب
تیری مرضی ہے تو لے آہیں گئیں ماتم گئے