وہ بستیاں وہ بام وہ در کتنی دور ہیں

وہ بستیاں وہ بام وہ در کتنی دور ہیں
مہتاب تیرے چاند نگر کتنی دور ہیں

وہ خواب جو غبار گماں میں نظر نہ آئے
وہ خواب تجھ سے دیدۂ تر کتنی دور ہیں

بام خیال یار سے اترے تو یہ کھلا
ہم سے ہمارے شام و سحر کتنی دور ہیں

اے آسمان ان کو جہاں ہونا چاہئے
اس خاک سے یہ خاک بسر کتنی دور ہیں

بیٹھے بٹھائے دل کے سفر پر چلے تو آئے
لیکن وہ مہربان سفر کتنی دور ہیں

یہ بھی غزل تمام ہوئی شام ہو چکی
افسون شاعری کے ہنر کتنی دور ہیں