وقت کی آنکھ سے کچھ خواب نئے مانگتا ہے

وقت کی آنکھ سے کچھ خواب نئے مانگتا ہے
دل مرا ایک دعا رات گئے مانگتا ہے

ایک آواز تہہ آب بلاتی ہے مجھے
عشق مجھ سے بھی وہی کچے گھڑے مانگتا ہے

درد کہتا ہے کسی ساعت تنہا میں رہوں
اک مکاں گہرے سمندر سے پرے مانگتا ہے

ضبط چاہے اسے رخصت کی اجازت مل جائے
اشک آنکھوں سے محبت کے صلے مانگتا ہے

دشت در دشت لیے پھرتا ہے مجھ کو یہ جنوں
امتحاں عشق میں کچھ اور کڑے مانگتا ہے