waise hi KHayal aa gaya hai
ya dil mein malal aa gaya hai
aansu jo ruka wo kisht-e-jaan mein
barish ki misal aa gaya hai
gham ko na ziyan kaho ki dil mein
ek sahib-e-haal aa gaya hai
jugnu hi sahi fasil-e-shab mein
aaina-KHisal aa gaya hai
aa dekh ki mere aansuon mein
ye kis ka jamal aa gaya hai
muddat hui kuchh na dekhne ka
aankhon ko kamal aa gaya hai
main kitne hisar toD aai
jina tha muhaal aa gaya hai
Ghazal
Waise hi KHayal aa gaya hai
Ada Jafri