Wahm sabit hue sab KHwab suhane tere

wahm sabit hue sab KHwab suhane tere
yaad karte hain magar log fasane tere

kash wo din na kabhi aae ki tu aa jae
ras aate hain mere ji ko bahane tere

aisi uftad paDi apni KHabar bhi na rahi
hum to aae the yahan rang jamane tere

kal chhupa rakhte the KHud se bhi mohabbat apni
aaj aae hain tujhe dagh dikhane tere

KHalq ka dhyan haTate rahe kanTe kya kya
raaz ifsha kiye sab baad-e-saba ne tere

dard kya kya na mile shauq-e-talab se apne
zaKHm kya kya na diye zauq-e-haya ne tere

juz tere chahne wala tha na un ka koi
lauT kar aae na 'shohrat' wo zamane tere