واعظ بتوں کے آگے نہ فرقاں نکالئے

واعظ بتوں کے آگے نہ فرقاں نکالئے
صورت سے ان کی معنیٔ قرآں نکالئے

ہے دل میں مدعا کہ عوض جاں نکالئے
جی کھوئیے پہ جی کا نہ ارماں نکالئے

اس دل میں ایسے تیر ہیں کتنے ہی بے نشاں
آپ اپنا دیکھ بھال کے پیکاں نکالئے

ہے جی میں رکھئے آہ کے شعلہ پہ لخت دل
پریوں کے سر پہ تخت سلیماں نکالئے

زخم اور آئے لیک مری جاں خلش نہ جائے
دل چیرئے جگر سے نہ پیکاں نکالئے

دکھلائیے نہ کاوش پیکاں کا انتظار
نشتر سے جلد دیدۂ حیراں نکالئے

رہئے مذاقؔ حشر کے میداں میں سرخ رو
مضمون روئے شاہ شہیداں نکالئے