اترے طلسم شب کے اجالوں پہ رات بھر

اترے طلسم شب کے اجالوں پہ رات بھر
قرباں ہوئی ہے صبح چراغوں پہ رات بھر

ظلمت میں اپنی ڈوب گئیں دن کی بستیاں
سورج تمام چمکے ستاروں پہ رات بھر

اترے نہیں شبوں میں اڑانوں کے حوصلے
بیٹھے رہے پرند بھی شاخوں پہ رات بھر

اک لو نہیں نصیب غریبان شہر کو
شمعیں جلی ہیں کتنی مزاروں پہ رات بھر

ڈھلتی رہی نگاہ میں چہروں کی چاندنی
نازل ہوئے یقین گمانوں پہ رات بھر

پیراہن جمال ہے رخت برہنگی
پہنے گئے ہیں جسم لباسوں پہ رات بھر

خوشبو میں جذب ہو گئیں مہتابیاں صمدؔ
شبنم ہوئی نثار گلابوں پہ رات بھر