اٹھائے دوش پہ تاریخ حادثات جہاں

اٹھائے دوش پہ تاریخ حادثات جہاں
گزر رہا ہے دیار حیات سے انساں

بچھا رہا ہے فضاؤں میں دام کاہکشاں
ترے گداز بدن کا تبسم پنہاں

لبوں پہ لاکھ لگائے کوئی سکوت کی مہر
مگر خموشی نہ ہوگی جراحتوں کی زباں

بھڑک اٹھے نہ کہیں پھر چراغ زخم کی لو
سنبھل سنبھل کے سناؤ حدیث شہر بتاں

دھواں دھواں سی ملی ہے فضائے شہر جنوں
بجھی ہے رات گئے جب بھی مشعل زنداں

یہ وہ جہاں ہے کہ ہر شہر سنگ و خشت کے بعد
قدم قدم پہ ہے عشرتؔ دیار شیشہ گراں