اس سے بڑھ کر تو کوئی بے سر و ساماں نہ ملا

اس سے بڑھ کر تو کوئی بے سر و ساماں نہ ملا
دل ملا جس کو مگر درد غریباں نہ ملا

اک ذرا ذوق تجسس میں بڑھایا تھا قدم
نکہت گل کو پھر آغوش گلستاں نہ ملا

بات اتنی سی ہے اے واعظ افلاک نشیں
کیا ملے گا اسے یزداں جسے انساں نہ ملا

ان سے اب تذکرۂ دولت کونین ہے کیوں
جن غریبوں کو ترا گوشۂ داماں نہ ملا

خوبیٔ دولت و دانش پہ نظر ہے سب کی
کوئی اس دور میں دلدادۂ انساں نہ ملا