ان سے ہر حال میں تم سلسلہ جنباں رکھنا

ان سے ہر حال میں تم سلسلہ جنباں رکھنا
کچھ مداوائے غم گردش دوراں رکھنا

اپنے قابو میں ذرا گیسوئے پیچاں رکھنا
راس آتا نہیں دنیا کو پریشاں رکھنا

اس اندھیرے میں بھٹک جائیں نہ یادیں ان کی
اپنی مژگاں پہ چراغوں کو فروزاں رکھنا

آج کل بکتے ہیں بازار میں انساں کے ضمیر
تم ہو انسان تو پھر وقعت انساں رکھنا

داغ دل کے ہیں سلامت تو کوئی بات نہیں
تیرگی لاکھ سہی صبح کا امکاں رکھنا

موسم شہر نگاراں کا کوئی ٹھیک نہیں
گوشۂ دل میں کوئی آتش سوزاں رکھنا

تم سے سچ پوچھو تو اتنی ہے گزارش میری
اپنے افسرؔ کو خزاں میں بھی غزل خواں رکھنا