Un aankhon se pahle bhi kahin baat hui hai

un aankhon se pahle bhi kahin baat hui hai
sochunga kahan tum se mulaqat hui hai

taqdis-e-mohabbat pe kahin harf na aae
taskin-e-hawas shamil-e-jazbaat hui hai

ye raushni shaista ujalon ka hai dhoka
ai dost abhi KHatm kahan raat hui hai

haalat hi aise hain ki thamte nahin aansu
ab zindagi be-waqt ki barsat hui hai

jis rose se hum shahr-e-tamanna mein luTe hain
afsurdagi ham-shakl-e-munajat hui hai

tum bhi to 'rais' aaj nae zehn se socho
ab tak to ghazal nazr-e-riwayat hui hai