un aankhon mein rang-e-mai nahin hai
kuchh aur hai ye wo shai nahin hai
kashti to rawan hai kab se shab ki
kis ghaT lagegi tai nahin hai
kya dil mein basaun teri surat
aaine mein aks hai nahin hai
daman ko zara jhaTak to dekho
duniya hai kuchh aur shai nahin hai
aahang-e-sukut dam-ba-dam sun
ye saz-e-nafas hai nai nahin hai
Ghazal
Un aankhon mein rang-e-mai nahin hai
Ahmad Mahfuz