الفت شیریں کو بھاری سل سمجھ
سہل کو اے کوہ کن مشکل سمجھ
گرد باد دشت اے مجنوں نہ ہو
تل کو لیلہ چشم کو محمل سمجھ
جان نبض راہ دشت نیستی
تیغ ابرو کا مجھے بسمل سمجھ
دل کو بیت اللہ کہتا ہے جہاں
اس کو اے بت منزلت منزل سمجھ
ہے جو شب بیدار تیری یاد میں
اس فرامش کار کو غافل سمجھ
خون دل ہے سرخ روئی کا نشاں
مجھ کو بسمل اپنا اے قاتل سمجھ
وہ نگاہ گرم ہے برق اے وقارؔ
خرمن ہستی کو بے حاصل سمجھ
غزل
الفت شیریں کو بھاری سل سمجھ
کشن کمار وقار