ufuq tak mera sahra khil raha hai
kahin dariya se dariya mil raha hai
libas-e-abr ne bhi rang badla
zamin ka pairahan bhi sil raha hai
isi taKHliq ki aasudgi mein
bahut bechain mera dil raha hai
kisi ke narm lahje ka qarina
meri aawaz mein shamil raha hai
main ab us harf se katra rahi hun
jo meri baat ka hasil raha hai
kisi ke dil ki na-hamwariyon par
sambhalna kis qadar mushkil raha hai
Ghazal
Ufuq tak mera sahra khil raha hai
Yasmeen Hameed