udas shamon bujhe darichon mein lauT aaya
bichhaD ke us se main apni galiyon mein lauT aaya
chamakti saDkon pe koi mera nahin tha so main
malul peDon ujaD raston mein lauT aaya
KHizan ke aaghaz mein ye achchha hua ki main bhi
KHud apne jaise fasurda logon mein lauT aaya
hasin yaadon ke chand ko alwidaa kah kar
main apne ghar ke andhere kamron mein lauT aaya
main khul ke roya nahin tha pichhle kai baras se
'hasan' wo sailab phir se aankhon mein lauT aaya
Ghazal
Udas shamon bujhe darichon mein lauT aaya
Hasan Abbasi