اداس شام میں پژمردہ باد بن کے نہ آ

اداس شام میں پژمردہ باد بن کے نہ آ
جو آ سکے تو خود آ اپنی یاد بن کے نہ آ

کبھی سحر بھی تو بن اے وصال کے موسم
سدا یوں ہی شب مرگ مراد بن کے نہ آ

تجھے ترے مہ و انجم کا واسطہ اے رات
مرے ان اجلے دروں پر سواد بن کے نہ آ

کتاب زیست خدا را کوئی غزل بھی سنا
شکست جاں کی فقط روئداد بن کے نہ آ

بھلی لگے تو اسے گنگنا بھی اے لب یار
مری غزل پہ فقط حرف داد بن کے نہ آ

اتر ضرور مگر آہ صبح آزادی
کسی زمین پہ وجہ فساد بن کے نہ آ