ubal paDa yak-ba-yak samundar to main ne dekha
khula jo raaz-e-sukut lab par to main ne dekha
utar gaya rang-e-ru-e-manzar to main ne dekha
haTi nigah-e-bahaar yaksar to main ne dekha
na jaane kab se wo andar andar sulag raha tha
mila jo diwar mein mujhe dar to main ne dekha
tamam gard-o-ghubar dil se nikal chuka tha
baras chuka abr-e-ashk khul kar to main ne dekha
nishan qadmon ke raste mein chamak rahe the
guzar gaya wo nazar bacha kar to main ne dekha
mila ke miTTi mein rakh di us ne ibaadat us ki
jo mere aage na KHam kiya sar to main ne dekha
Ghazal
Ubal paDa yak-ba-yak samundar to maine dekha
Ghulam Murtaza Rahi