tu kyun pas se uTh chala baiThe baiThe
hua tujh ko kya bewafa baiThe baiThe
wo aate hi aate rahe par qalaq se
mera kaam hi ho gaya baiThe baiThe
uThate ho kyun apni mahfil se mujh ko
liya main ne kya aap ka baiThe baiThe
kare sai kuchh uTh ke us ku se ai dil
ye hasil hua muddaa baiThe baiThe
wo is lutf se galiyan de gae hain
kiya karte hain hum dua baiThe baiThe
zara ghar se bahar nikal man kahna
na hoga koi mubtala baiThe baiThe
na uTTha gaya dil ke hathon se 'taskin'
kaha us ne jo sab suna baiThe baiThe
Ghazal
Tu kyun pas se uTh chala baiThe baiThe
Taskeen Dehlavi