تو اپنے پھول سے ہونٹوں کو رائیگاں مت کر

تو اپنے پھول سے ہونٹوں کو رائیگاں مت کر
اگر وفا کا ارادہ نہیں تو ہاں مت کر

تو میری شام کی پلکوں سے روشنی مت چھین
جہاں چراغ جلائے وہاں دھواں مت کر

پھر اس کے بعد تو آنکھوں کو سنگ ہونا ہے
ملی ہے فرصت گریہ تو رائیگاں مت کر

چھلک رہا ہے ترے دل کا درد چہرے سے
چھپا چھپا کے محبت کو داستاں مت کر

تو جاتے جاتے نہ دے مجھ کو زندگی کی دعا
میں جی سکوں گا ترے بعد یہ گماں مت کر