tumhaare chaak par ai kuza-gar lagta hai Dar hum ko
ajab pagal si ek parchhain aati hai nazar hum ko
ye kaisi baat hai din ki ghaDi hai aur andhera hai
chamakti dhup mein sona paDa hai raat-bhar hum ko
hamein ghar se nikala tha to ye bhi soch lena tha
ki sahab phir kabhi aana nahin hai lauT kar hum ko
abhi thoDa sa shayad aur kuchh qissa chukana hai
abhi kuchh aur thoDi dur karna hai safar hum ko
nahin malum kis chakkar mein ye haalat bana Dali
liye jata hai ek dariya-e-be-tabi kidhar hum ko
Ghazal
Tumhaare chaak par ai kuza-gar lagta hai Dar hum ko
Shamim Hanafi