tujhe KHalq kahti hai KHud-numa tujhe hum se kyun ye hijab hai
tera jalwa tera hai parda-dar tere ruKH pe kyun ye naqab hai
tujhe husn maya-e-naz hai dil-e-KHasta mahw-e-niyaz hai
kahun kya ye qissa-e-raaz hai mera ishq KHana-KHarab hai
ye risala ishq ka hai adaq tere ghaur karne ka hai sabaq
kabhi dekh is ko waraq waraq mera sina gham ki kitab hai
teri jazb mein hai rubudgi tere sukr mein hai ghunudgi
na KHabar shuhud-o-wajud ki na tarang-e-mauj-e-sarab hai
ye wahi hai 'saqi'-e-shefta jo hai dil se tera farefta
ye hai tera banda guriKHta ki jo KHaksar-e-turab hai
Ghazal
Tujhe KHalq kahti hai KHud-numa tujhe humse kyun ye hijab hai
Pandit Jawahar Nath Saqi