تہمت سیر چمن ہم پہ لگی کیا نہ ہوا

تہمت سیر چمن ہم پہ لگی کیا نہ ہوا
طبع آزاد میں زنجیر پڑی کیا نہ ہوا

وہ الم دوست تھے ہم جن کی ہر اک موسم میں
دیکھتے دیکھتے خوشیوں سے ٹھنی کیا نہ ہوا

خواب تو خواب رہے نیند بھی آنے سے رہی
گرد بیداریٔ شب منہ پہ ملی کیا نہ ہوا

سینۂ برگ‌ گل تر پہ نظر تھی اپنی
زندگی آگ کے سانچے میں ڈھلی کیا نہ ہوا

ہم تو کیا چیز تھے اس شہر کے ہنگاموں میں
اہل دانش کی کہاں پیش چلی کیا نہ ہوا