teri shikast hai zahir tera zawal aTal
yahi hai tera muqaddar ki apni aag mein jal
KHata ki tu ne ki yaron ke qatl ki KHwahish
saza ki apne janaze ko KHud uTha kar chal
kisi tarah se miTa de ye naqsh-ha-e-yaqin
kisi tarah se bhi is shahr-e-arzu se nikal
sitam ki TuT raha hai tilism-e-harf-o-nawa
fughan ki bujhne lagi hai KHayal ki mashal
'elinapa' bhi nahin aur wo bewafa bhi nahin
sunaen shahr mein 'pashi' kise ye taza ghazal
Ghazal
Teri shikast hai zahir tera zawal aTal
Kumar Pashi