tere diwane izhaar-e-mohabbat kar nahin sakte
mohabbat kar ke tauhin-e-mohabbat kar nahin sakte
talluq KHas hai dil ko KHayal-e-ranj-o-rahat se
kisi ko hum sharik-e-ranj-o-rahat kar nahin sakte
jo shaida hain mohabbat ke jo diwane hain ulfat ke
wo apne dushmanon se bhi adawat kar nahin sakte
jawan hain jin ke pahlu mein KHayal-e-pas KHuddari
zarurat mein bhi izhaar-e-zarurat kar nahin sakte
kiya iman taza qamat-e-dildar ne aisa
'safir' ab hum bhi inkar-e-qayamat kar nahin sakte
Ghazal
Tere diwane izhaar-e-mohabbat kar nahin sakte
Mohammad Abbas Safiir