ترے دیار میں کوئی بھی ہم زباں نہ ملا

ترے دیار میں کوئی بھی ہم زباں نہ ملا
ہزار نقش ملے کوئی راز داں نہ ملا

میں سوچتا ہوں کہ یہ بھی حسین ہیں لیکن
تصور رخ جاناں کا امتحاں نہ ملا

یہ سچ نہیں ہے کہ چھٹنے کے بعد جان وصال
تجھے زمیں نہ ملی مجھ کو آسماں نہ ملا

ادائے خاص ملی اور صلائے عام ملی
مگر کہیں بھی وہ انداز جان جاں نہ ملا

گدا شناسی‌ٔ اہل کرم مسلم ہے
ہم اٹھ کے جس کے قدم لیں وہ پاسباں نہ ملا

جہاں بھی دیکھا وہیں پایا تجھ کو جان وصال
تری نگاہ کا پرتو کہاں کہاں نہ ملا

وہ دل ہی کیا جو محبت سے آشنا نہ ہوا
سفینہ کیا وہ جسے بحر بیکراں نہ ملا

کسے سنائیں غزل بہر شرح دل مسعودؔ
کہ اس دیار میں کوئی بھی نکتہ داں نہ ملا