teri madad se tera idrak ho sake hai
warna is aadmi se kiya KHak ho sake hai
tu hi samajh samajh kar kar de maf hum ko
tera hisab hum se kab pak ho sake hai
KHatra nahin kisi ka jo chahe kar sake hai
tujh sa koi jahan mein bebak ho sake hai
rone ko mere jaldi Tuk dekh khol aankhen
ab tak hai chashm meri namnak ho sake hai
lakhon ka dil jalaya lakhon ka ji khapaya
tujh se koi ziyaada saffak ho sake hai
wo jald dastiyon ke jate rahe zamane
ab hath se gareban kab chaak ho sake hai
jo kuchh sharab mein hain kaifiyyaten nashe ki
tujh mein maza ye koi tiryak ho sake hai
us mah-ru ko baham kar de 'hasan' se ek shab
gardish se teri itna aflak ho sake hai
Ghazal
Teri madad se tera idrak ho sake hai
Meer Hasan