طور اپنا ہے الگ ایں سے الگ آں سے الگ

طور اپنا ہے الگ ایں سے الگ آں سے الگ
گو کسی طور نہیں حکمت یزداں سے الگ

زیست اک اور بھی ہے قید رگ جاں سے الگ
صبح تاباں سے جدا شام غریباں سے الگ

ظلمت شب کی طرح نور شبستاں سے الگ
غم دوراں سے الگ عشق نگاراں سے الگ

گر ترے واسطے دل دھڑکے تو زندہ تو ہے
دل کی آواز ہے آواز پریشاں سے الگ

جب کبھی فکر مرا رمز انا سے الجھا
عالم اک اور بنا عالم امکاں سے الگ

عمر یوں ہم نے گزاری ہے زمانے میں جمیلؔ
نہ رم زیست میں شامل نہ غم جاں سے الگ