طلب کی راہوں میں سارے عالم نئے نئے سے

طلب کی راہوں میں سارے عالم نئے نئے سے
شجر حجر لوگ شہر موسم نئے نئے سے

چمک رہا تھا فلک پہ سورج نیا نیا سا
لٹا چکی تھی خزانے شبنم نئے نئے سے

ہیں اب بھی آنکھوں کے دیدبانوں میں اپنی وہ دن
لگے دیار سحر کو جب ہم نئے نئے سے

تموجوں کی رگوں میں شورش نئی نئی سی
لہو کے جھگڑے بدن میں پیہم نئے نئے سے

پرانے ہوتے ہوئے صحیفے درخت انساں
یہ چاند سورج ستارے ہر دم نئے نئے سے

کبھی تو آئیں گے شاخ دل پر گلاب تازہ
ملیں گے اسعدؔ ہمیں بھی موسم نئے نئے سے