تخت جس بے خانماں کا دشت ویرانی ہوا

تخت جس بے خانماں کا دشت ویرانی ہوا
سر اپر اس کے بگولا تاج سلطانی ہوا

کیوں نہ صافی اس کوں حاصل ہو جو مثل آرسی
اپنے جوہر کی حیا سوں سر بسر پانی ہوا

زندگی ہے جس کوں دائم عالم باقی منیں
جلوہ گر کب اس انگے یو عالم فانی ہوا

بیکسی کے حال میں یک آن میں تنہا نہیں
غم ترا سینے میں میرے ہمدم جانی ہوا

اے ولیؔ غیرت سوں سورج کیوں جلے نئیں رات دن
جگ منیں وو ماہ رشک ماہ کنعانی ہوا