tabhi to main mohabbat ka hawalati nahin hota
yahan apne siwa koi mulaqati nahin hota
giraftar-e-wafa rone ka koi ek mausam rakh
jo nala roz bah nikle wo barsati nahin hota
bichhaDne ka irada hai to mujh se mashwara kar lo
mohabbat mein koi bhi faisla zati nahin hota
tumhein dil mein jagah di thi nazar se dur kya karte
jo markaz mein Thahar jae mazafati nahin hota
Ghazal
Tabhi to main mohabbat ka hawalati nahin hota
Afzal Khan