Ta-abad ek hi charcha hoga

ta-abad ek hi charcha hoga
koi hum sa koi tum sa hoga

isi tarik zamin ka manzar
chand par chandni jaisa hoga

suraj aaya hai meri samt magar
dusri samt andhera hoga

kash pahle se koi batla de
kis tarah zikr hamara hoga

aise begana na sunna logo
ye bhi afsana kisi ka hoga

wo nahin aaega is mahfil mein
dur hi dur se sunta hoga

aai be-saKHta har sher pe dad
kitne mani nahin samjha hoga

kaun tha jis ne rakhi tujh se ummid
han to wo shaKHs mujhi sa hoga

kaun tha abr jo ban kar barsa
han to wo tujh ko tarasta hoga

kaun tha jis se hui tai manzil
han to pahle wo bhaTakta hoga

kaun tha jis se ye shoale bhaDke
han to wo KHub sulagta hoga

tum raho chup ki ghazal-KHwan 'ali'
na bura hoga na achchha hoga