سنو تو خوب ہے ٹک کان دھر میرا سخن پیارے

سنو تو خوب ہے ٹک کان دھر میرا سخن پیارے
کہ عاشق پر نہ ہونا اس قدر بھی دل کٹھن پیارے

کدھر ہو بے خبر ہو کیا مگر احوال سیں میرے
ادھر دیکھو اے ظالم لاوبالی من ہرن پیارے

نہ کر آزردہ خاطر بلبل بے تاب کوں ہرگز
غنیمت بوجھ دو دن کی بہار اے من ہرن پیارے

پھنسا ہے مجھ سری کا صید آ کر دام میں تیرے
کیا تو نے مگر کچھ سحر اے جادو نین پیارے

تغافل مت کرو اے نو بہار گلشن خوبی
تمہارے بن نپٹ بے آب ہے دل کا چمن پیارے

مرے دل کی کلی مرجھا رہی ہے صرصر غم سیں
کرو ٹک مسکرا کر بات اے شیریں دہن پیارے

سراجؔ اب شعلۂ الفت میں جیوں پروانہ جلتا ہے
نہ جانوں تجھ ستی اس کوں لگی ہے کیا لگن پیارے