sukut-e-sham samundar parindagan suraj
ye lamha lamha badalta hua jahan suraj
fasil-e-shahr-e-shikasta ke miT gae aasar
guzishta ahd ki kahta hai dastan suraj
samundaron ke safar par hue rawana jab
hamare sath chala misl-e-baadban suraj
wo maujen marta dariya ya reg-e-sahra hai
ajib Dhang se leta hai imtihan suraj
zamin pe rang hain jitne sabhi isi se hain
hamare sar pe chamakta hai mehrban suraj
Ghazal
Sukut-e-sham samundar parindagan suraj
Mohammad Ali Manzar