subh-dam uTh kar tera pahlu se jaana yaad hai
loTna dil ka jigar ka phaDphaDana yaad hai
yar tha pahlu mein shishe ki pari thi samne
kyun dil-e-nalan tujhe wo bhi zamana yaad hai
sun ke ahwal-e-mohabbat ko mera bola wo shoKH
jaan dene ka tujhe achchha bahana yaad hai
loT tha dil qamat-e-dildar par muddat hui
naKHl-e-tuba par tha apna aashiyana yaad hai
kaun dekhe KHanda-e-gul ki taraf ai andalib
ek muddat se kisi ka muskurana yaad hai
kya dikhata hai falak abr-e-siyah mein ru-e-mah
hum ko baalon mein kisi ka munh chhupana yaad hai
ho muqabil nala-e-dard-e-dil-e-ushshaq ke
baghban bulbul ko aisa bhi tarana yaad hai
hijr ki shab nind aae aashiq-e-bimar ko
'muntahi' tujh ko koi aisa fasana yaad hai
Ghazal
Subh-dam uTh kar tera pahlu se jaana yaad hai
Mirza Maseeta Beg Muntahi