سوز پروانہ نور دین شمع
تار زنار دل نشین شمع
قطرۂ خون زخم پروانہ
قشقۂ تازۂ جبین شمع
تم بھی دو ایک بوسہ بہر خدا
کہ ہے گلگیر بوسہ چین شمع
دانۂ عشق بو رہا ہے پتنگ
سوختہ گرچہ ہے زمین شمع
میری عرض حیات کا ہے طول
نفس تنگ واپسین شمع
آہ پروانہ کا پریشاں دود
بن گیا زلف عنبرین شمع
قدر مجنوں نہ ہوگی میرے بعد
خاک جگنو ہو جانشین شمع
روز اول سے ہیں بہم مربوط
دست پروانہ آستین شمع
حق میں پروانہ کے ہے تیر شہاب
اے وقارؔ آہ آتشین شمع
غزل
سوز پروانہ نور دین شمع
کشن کمار وقار