shamen raushan hain aabginon mein
dagh-e-dil jal rahe hain sinon mein
phir kahin bandagi ka nam aaya
phir shikan paD gai jabinon mein
le ke tesha uTha hai phir mazdur
Dhal rahe hain jabal mashinon mein
zehn mein inqilab aate hi
jaan si paD gai dafinon mein
baat karte hain gham-nasibon ki
aur baiThe hain shah-nashinon mein
jin ko girdab ki KHabar hi nahin
kaise ye log hain safinon mein
ham-safiro chaman ko batla do
sanp baiThe hain aastinon mein
hum na kahte the shairi hai wabaal
aaj lo ghir gae hasinon mein
Ghazal
ShaMein raushan hain aabginon mein
Wamiq Jaunpuri