shahr-e-nigaran mein phirte hain hum aawara raat Dhale
shayad koi daricha wa ho shayad koi dip jale
koi gham-agin naghma chheDe koi 'mir' ke sher paDhe
kam kam dard ki kaliyan mahken pal pal gham ki raat Dhale
viran viran dil ki basti suni suni rah-e-wafa
aise kaThin raste pe koi do-chaar qadam to sath chale
chaak har ek gul ka daman aur aawara har mauj-e-saba
jaise mujh se mil na saka ho koi bichhaDte waqt gale
KHatm hua hai 'ishqi' tum par silsila-e-wahshat-zadagan
shayad koi shaKHs tumhaare baad wafa ka nam na le
Ghazal
Shahr-e-nigaran mein phirte hain hum aawara raat Dhale
Shahid Ishqi