shadid pyas thi phir bhi chhua na pani ko
main dekhta raha dariya teri rawani ko
siyah raat ne behaal kar diya mujh ko
ki tul de nahin paya kisi kahani ko
bajae mere kisi aur ka taqarrur ho
qubul jo kare KHwabon ki pasbani ko
aman ki ja mujhe ai shahr tu ne di to hai
bhula na paunga sahra ki be-karani ko
jo chahta hai ki iqbaal ho siwa tera
to sab mein banT barabar se shadmani ko
Ghazal
Shadid pyas thi phir bhi chhua na pani ko
Shahryar