Shab wasl ki bhi chain se kyunkar basar karen

shab wasl ki bhi chain se kyunkar basar karen
jab yun nigahbani murgh-e-sahar karen

mahfil mein ek nigah agar wo idhar karen
sau sau ishaare ghair se phir raat bhar karen

tufan-e-nuh lane se ai chashm faeda
do ashk bhi bahut hain agar kuchh asar karen

aaz o hawas se KHalq hua hai ye na-murad
dil par nigah kya hai wo mujh par nazar karen

kuchh ab ke hum se bole to ye ji mein hai ki phir
naseh ko bhi raqib se aazurda-tar karen

wan hai wo naghma jis se ki huron ke hosh jaen
yan hai wo nala jis se farishte hazar karen

ahl-e-zamana dekhte hain aib hi ko bas
kya faeda jo 'shefta' arz-e-hunar karen