shamil tu mere jism main sanson ki tarah hai
ye yaad bhi sukhe hue phulon ki tarah hai
dil jis ka nahin harf-e-mohabbat se shanasa
wo zindagi viran mazaron ki tarah hai
fitrat mein hai daulat ke khilaunon se bahalna
ek dost mera shahr mein bachchon ki tarah hai
har raat charaghan sa raha karta hai ghar mein
ek zaKHm mere dil mein sitaron ki tarah hai
mat kholiyo mujh par kabhi ehsan ke dariche
ghairat mujhe pyari teri yaadon ki tarah hai
patthar sada zillat ke taaqub mein rahenge
kotahi-e-guftar gunahon ki tarah hai
Ghazal
Shamil tu mere jism main sanson ki tarah hai
Rais Siddiqui