shaKHon par jab patte hilne lagte hain
aansu mere dil pe girne lagte hain
tujh se duri aur qayamat lagti hai
aapas mein do waqt jo milne lagte hain
din to jaise-taise kaT hi jata hai
raat ko uTh uTh tare ginne lagte hain
ek tabassum dekh ke tere honTon par
phul KHizan ki rut mein khilne lagte hain
hota hai shanon pe mahsus us ka hath
mausam jab bhi rang badalne lagte hain
us ki jab ho jae 'nusrat' chashm-e-karam
chaak garebanon ke silne lagte hain
Ghazal
ShaKHon par jab patte hilne lagte hain
Saba Nusrat