سرگرم تماشہ تھا دل محو ادا برسوں

سرگرم تماشہ تھا دل محو ادا برسوں
سمجھا ہی نہیں ناداں مفہوم وفا برسوں

آشفتہ مزاج آخر جائیں تو کہاں جائیں
ہر گام پہ یاروں نے دھوکا ہی دیا برسوں

اک بار گزرتا ہے دل درد کی راہوں سے
رگ رگ سے تڑپتی ہے تاثیر دعا برسوں

وہ عالم مدہوشی وہ مستئ رندانہ
گل رنگ جوانی تھی کیا ہوش ربا برسوں

آغوش تصور میں سو بار گو آتے ہیں
لیکن نہ قریب آئے وہ جان حیا برسوں

گو میرؔ کے نالوں میں تاثیر جنوں کم تھی
ایسا بھی کہاں ہوگا اب شعلہ نوا برسوں